Uwase Muyango na Kimenyi Yves basezeranye imbere y’Amategeko Mu Mujyi wa Kigali {Amafoto}

Miss Uwase Muyango Claudine wahize abandi muri 2019 mu cyiciro cy’ikamba rya Miss Photogenic mu irushanwa rya Miss Rwanda, Yasezeranye imbere y’amategeko n’umukunzi we Kimenyi Yves nawe uzwicyane mu mupira w’Amaguru mu Rwanda.

Kuri uyu wa kane tariki ya 4 Mutarama 2024, Ku isaha ya 1: 00 Pm Nibwo aba bombi bazwi mu myidagaduro yo Mu Rwanda bageze ku biro by’Umujyi wa Kigali mu muhango wo gusezerana kuzabana nk’umugore n’umugabo imbere y’amategeko ya Repubulika y’U Rwanda.

Amakuru yamenyekanye ko aba bombi bazakora ubukwe tariki 6 Mutarama 2024 kuri Romantic Garden ku Gisozi, Tubabwire ko Urukundo rw’aba bombi rwatangiye kuvugwa cyane mu mwaka wa 2019, Umunyezamu Kimenyi Yves yakiniye amakipe akomeye mu Rwanda arimo APR, Kiyovu Sports ndetse na Rayon Sports, Ndetse kuri ubu akaba akinira AS Kigali.

Muri rusange Kimenyi Yves na Muyango bamaze imyaka isaga 5 bari mu munyenga w’Urukundo, Kimenyi yaje kwambika impeta Umukunzi we Muyango y’integuza y’ubukwe muri Gashyantare 2021, Ikindi gisa n’umugisha mu mibanire y’aba bombi ni uko muri Kanama 2021, Imana yabahaye umugisha w’umwana w’umuhungu bise Kimenyi Miguel Yanis.

Ahagana mu mpera za 2023 Nibwo aba bombi bitangarije ko bagiye gukora ubukwe ndetse mu Ukuboza 2023 Miss Muyango akorerwa ibirori byo gusezera ku bukumi bwe. Ubukwe bwaba bombi bukaba butegerejwe ku wa 06 Mutarama 2024, Aho byitezwe ko buzitabirwa n’ibyamamare by’ingeri zitandukanye mu mikino, imyidagaduro n’itangazamakuru.