Ikipe y’ingabo z’igihugu APR FC, yamaze gutandukana n’umukinnyi ukomoka muri Cameroun witwa Salomon Bienvenue Banga Bindjeme Charles II wamaze kwerekeza mw’ikipe yo muri Iraq.
Uyu mukinnyi ubusanzwe ukina mu mutima w’ubwugarizi, yinjiye mw’ikipe ya APR FC muri Nyakanga 2023, hari mbere y’uko umwaka w’imikino wa 2023-24 utangira akaba yari yayisinyiye amasezerano y’ imyaka 2.
Uyu mukinnyi, umutoza wa APR FC Umufaransa Thierry Froger, ntiyigeze amwiyumvamo, aho yabuze umwanya wo gukina kugeza asabye gutandukana n’iyi kipe.
Nubwo ku Cyumweru tariki ya 4 Gashyantare 2024 yari ku ntebe y’abasimbura mu mukino APR FC yatsinzemo Musanze 3-1, Banga yamaze kugera muri Iraq aho yatangiye imyitozo muri Al Shorta Sporting Club.
Salomon Banga, akaba yamaze gusinyira Al Shorta Sporting Club yo mu cyiciro cya mbere muri Iraq, yanatangiye gukora imyitozo muri iyi kipe.
