Ejo hashize ku cyumweru tariki 07 Mata 2024, mu Rwanda hatangiye ibikorwa byo Kwibuka ku nshuro ya 30 Jenoside yakorewe Abatutsi mu 1994, Ikipe ya Bayern Munich nayo ikaba yarifatanyije n’Abanyarwanda kwibuka.
Mu butumwa iyi kipe yanyujije ku mbuga nkoranyambaga zayo zirimo X, yahoze ari Twitter bugaragaza ko yifatanyije n’u Rwanda muri ibi bihe byo Kwibuka Jenoside yakorewe Abatutsi mumwaka w’ 1994.
Yagize iti “Uyu munsi twifatanyije n’Abanyarwanda Kwibuka ku nshuro ya 30 Jenoside yakorewe Abatutsi mu 1994 ndetse tunishimira iterambere ry’u Rwanda mu myaka 30 ishize.”
Abakinnyi ba Bayern Munich batanze ubutumwa barimo Kapiteni Manuel Neuer, myugariro Alphonso Davies ndetse na Serge Gnabry ukina muri ba rutahizamu.
Aba bakinnyi bose bafatanyirije hamwe batanga ubutumwa bwiganjemo ubushimangira iterambere u Rwanda rumaze kugeraho mu myaka 30 ishize ndetse bakangurira buri munyarwanda gukomeza kurwanira ishyaka igihugu cye ndetse no gukomeza kubaka ubumwe no gushyira hamwe mu rwego rwo kwiyubaka birambye.
Ikipe ya Bayern Munich isanzwe igirana imikoranire n’igihugu cy’u Rwanda binyuze muri Gahunda ya Visit Rwanda, bakaba baratangiye gukorana mu mwaka ushize wa 2023.
