Umuhanzi Bruce Melodie uzwi nka Bruce Melodie akomeje kwigarurira imitima y’abanyamahanga nkuko yabikoze mu karere ka Afurika y’uburasirazuba ndetse no mu Rwanda avukamo ku myaka ye inakiri mito cyane.
Bruce Melodie uwavuga ko ari mu bahanzi bahiriwe cyane bidasubirwaho n’umwaka turi gusoza wa 2023 ntiyaba abeshya kuko bigaragarira amaso. Ikindi cyiza kibirimo nuko yahiriwe mu Rwanda avukamo, Afurika ndetse no ku mugabane w’uburayi icyarimwe ndetse akaba avuga ko kuri we ntacyo arakora ahubwo bigitangira.
Bruce Melodie abinyujije mu ndirimbo yakoranye n’umuhanzi wo muri Jamaica wakanyujijeho mu myaka ishize uzwi nka Shaggy mu ndirimbo nka “Church” n’izindi we na Bruce Melodie bongeye gutanga ibyishimo muri Leta zunze ubumwe za Amerika mu gusoza ibitaramo bari bamazemo iminsi biswe “I Heart Radio Jingle Ball Tour” nyuma y’ikindi cyari cyabaye kuwa 28 Ugushyingo nacyo cyiswe ‘i Heart Radio Jingle Ball Tour’ cyabereye muri Dickies Arena mu mujyi wa Dallas.
Aba bahanzi bombi bagiye bakorana ibitaramo bitandukanye n’ibiganiro ku ma radio atandukanye byo kumenyekanisha indirimbo bakoranye bise “When she is Around”, Kuri iyi nshuro Shaggy na Bruce Melodie batanze ibyishimo ku basaga ibihumbi 20 bose bari bitabiriye iki gitaramo gisoza uruhererekane rw’ibitaramo byabo bise “i Heart Radio Jingle Ball Tour”.
Ni igitaramo cyabaye mu ijoro ryo kuri uyu wa Gatandatu tariki 16 Ukuboza 2023, Aho umunyabigwi mu muziki Shaggy yongeye kwifashisha umunyarwanda Bruce Melodie muri icyo gitaramo gisoza ‘i Heart Radio Jingle Ball Tour’ maze bagasusurutsa imbaga y’abanyamerika kakahava.
Iki gitaramo cyabereye muri Amerant Bank Arena iherereye i Miami muri Leta ya Florida, ndetse ibihumbi by’abantu basaga ibihumbi 20 bakaba bari bayuzuye baje kwihera ijisho ibi byamamare bakunda, Mu mashusho i Heart Radio yatambukije ku mbuga nkoranyambaga, agaragaza Shaggy na Bruce Melodie bari kuririmba indirimbo ‘When she is Around’ bakoranye, abantu babafasha kuyiririmba.
Mbere yo gutarama Shaggy yabwiye i Heart Radio ko yumvise indirimbo ‘Funga Macho’ Bruce Melodie yari yashyize hanze, ikamutwara umutima agasaba uyu muhanzi wo mu Rwanda ko bayisubiranamo.
Bruce Melodie yasubiye muri Leta zunze ubumwe za Amerika nyuma yo kugaragara mu gitaramo cya “Move Africa” cyajemo umuhanzi mpuzamahanga w’umunyamerika “Kendrick Lamar”ndetse naho asiga ashimishije abanyarwanda ahita yerekeza nanone muri Leta zunze ubumwe za Amerika.
Igitaramo cya Shaggy na Bruce Melodie kandi cyanitabiriwe n’abandi bahanzi bakomeye mu muziki w’Isi barimo Nicki Minaj, David Kushner, Ludacris, Florida, Kenya Grace, Nicky Jam, Marshmello n’abandi batandukanye.
Ni mu gihe kwinjira muri iki gitaramo byari ama $60 mu myanya isanzwe, ndetse na $100 mu nyanya ya VIP, Kugeza ubu Bruce Melodie ataragaruka mu Rwanda byitezwe ko agomba no gutaramira abanyarwanda barimo n’abakunzi be batuye muri iki gihugu cya Amerika anabafasha kwizihiza no gusoza umwaka wa 2023.
Ni igitaramo kizabera mu mujyi wa Portland muri Leta ya Maine, tariki 30 Ukuboza 2023.
REBA HANO “WHEN SHE’S AROUND” YA BRUCE MELODIE NA SHAGGY.
