Nyuma guhamwa n’icyaha ariko agahanishwa igihano cy’igifungo gisubitse ndetse n’amande y’amafaranga, Apôtre Yongwe agarukanye imihigo ihambaye nyuma yo kwigira byinshi mu bihe yanyuzemo bitoroshye.
Kuri uyu wa kabiri tariki ya 19 Werurwe 2024, Nibwo Urukiko rw’Ibanze rwa Gasabo rwategetse ko Harelimana Joseph wamamaye cyane ku mazina ya Apôtre Yongwe uhamwa n’icyaha cyo kwihesha ikintu cy’undi hakoreshejwe uburiganya, Ahanishwa igihano cy’igifungo gisubitse cy’umwaka umwe, ndetse agacibwa n’ihazabu y’amafaranga ibihumbi 750 Frw.
Apôtre Yongwe yashinjwaga icyaha cyo gutinyisha abantu ikibi agamije ko bamuha amafaranga ngo abasengere ntibazagire icyo baba ari nako abizeza kuzabona ibyiza bihambaye, Ibi yashinjwa n’ubushinjacyaha ni nabyo yaje guhamywa n’urukiko rwa Gasabo.
Ibi bikorwa byatumye Apôtre Yongwe asabirwa n’ubushinjacyaha igifungo cy’imyaka itatu n’ihazabu ya miliyoni 5 Frw, ariko nyuma yo gusuzuma ibimenyetso byatanzwe n’Ubushinjacyaha, hiyongeraho kuba Apôtre Yongwe yaraburanye yemera icyaha anagisabira imbabazi.
Urukiko rushingiye ku gihano cy’igifungo cy’imyaka ibiri yagombaga guhabwa ariko gishobora kugabanywa, Apôtre Yongwe yahanishijwe igifungo cy’umwaka umwe n’ihazabu y’amafaranga ibihumbi 750 Frw.
Icyakora urukiko rw’ibanze rwa Gasabo rwatangaje ko ibihano bihawe Apôtre Yongwe bisubitswe mu gihe cy’umwaka umwe, bivuze ko ahita afungurwa ariko mu gihe cy’umwaka akaba agomba kwitwararika kugira ngo adakora icyaha.
Apôtre Yongwe yafashwe tariki 01 Ukwakira 2023, akurikiranyweho icyaha cyo kwihesha ikintu cy’undi hakoreshejwe uburiganya, ibizwi nka ‘escroquerie’ mu rurimi rw’Igifaransa.
Apôtre Yongwe ni we washinze Televiziyo ya YONGWE TV ikunze gutambutswaho amakuru atandukanye mu by’iyobokamana n’imyidagaduro, akaba yarakunze kugaragara mu biganiro binyuzwa kuri YouTube bigaruka ku myemerere ye mu by’iyobokamana no ku myitwarire y’abandi bapasiteri mu myigishirize yabo.
