Abahanzi babiri bari mu matafari agize umuziki nyarwanda bagiye guhuza imbaraga mu kuzamura Label ya 1:55 AM ndetse na muzika nyarwanda muri rusange, Nyuma y’igihe kitari gito basanzwe bakorana .
Amakuru yatugezeho mu kanya kashize yavugaga ko kugeza ubu umuhanzi Kenny Sol ufite izina rikomeye muri iyi minsi mu Rwanda ndetse no muri East Africa yamaze gusinya muri Label ya Coach Gael 1:55 Am isanzwemo mugenzi we Bruce Melodie wanamufashije igihe kitari gito muri Label ye yahoze yitwa “IGITANGAZA Music Empire”
Rusanganwa Norbert ukoresha amazina ya Kenny Sol mu muziki yatangiye kuririmba by’umwuga ubwo yasozaga amasomo y’umuziki mu ishuri rya Nyundo, atangira aririmba mu itsinda rya Yemba Voice yari ahuriyemo n’abahanzi Bill Ruzima na Mozzy Yemba Boy, Iri tsinda yaje gutandukana naryo ubwo ryari risenyutse muri 2019.
Uyu musore yaje gusinya mu Igitangaza Music ya Bruce Melodie muri 2019, atangirana urugendo na mugenzi we Juno Kizigenza bamaranyemo umwaka umwe nawe baratandukana. Kuri ubu Kenny Sol yamaze gusubirana na Bruce Melodie.
Amakuru yizewe ahamya ko umuhanzi Kenny Sol yamaze gusinya muri 1:55 Am y’umushoramari Coach Gael, Umwe mu bantu ba hafi, batifuje ko tubavuga, yagize Ati “Kenny Sol yamaze gusinya muri 1:55 Am, twebwe Bruce Melodie yamaze kubitubwira rwose kandi byemejwe”. Uyu muhanzi akaba agiye gusangamo Bruce Melodie babanye mu Igitangaza Music, Element na Ross Kana.
Kenny Sol uri mu bahanzi bakunzwe cyane mu Rwanda ndetse no mu karere ka Africa y’uburasirazuba yamenyekanye mu ndirimbo nka “Haso, Say My Name, Joli, Ikinyafu ndetse n’izindi nyinshi zazamuye izina rye mu ruhando rwa muzika nyuma yo kuva kwiga amasomo ajyanye n’umuziki ku nyundo.
Bruce Melodie yagaragaje ko yakunze impano n’inganzo ya Kenny Sol kuva bakorana kugeza n’igihe bari baratandukanye kuko ubwo Harmonize wo muri Tanzania yazaga mu Rwanda aje gukorana indirimbo na Bruce Melodie, yahujwe na Kenny Sol nawe bakorana indirimbo ‘One More Time’.
Kenny Sol yakomeje kugaragaza gukorana na 1:55 Am binyuze mu ndirimbo yagiye akorerwa na Producer Element. Bruce Melodie bivugwa ko afite imigabane muri 1:55 Am, yakoranye indirimbo ebyiri na Kenny Sol ‘Ikinyafu’ na ‘Igitangaza’ ya Juno Kizigenza.
Kugeza ubu Bruce Melodie arimo kubarizwa muri Kenya aho ari kumwe na Producer Prince Kiiiz, Jean Luc usanzwe umurindira umutekano na Kenny Mugarura, murumuna wa Coach Gael.
