Nyuma y’iminsi isaga 12 Alon Paul Gomis ageze murw’imisozi 1000, rutahizamu ukomoka muri Senegal yamaze gusinyira ikipe ya Rayon Sports.
Kw’itariki ya 22 Ukuboza 2023, ni bwo uyu mukinnyi w’imyaka 29 yageze mu Rwanda aje kurangizanya gahunda yari afitanye na Rayon Sports yo kuba yayikinira.
Akigera mu Rwanda ntago yahise asinyira iyi kipe kuko habanje kubaho igisa no kugorana ku mafaranga yifuzaga kugira ngo asinye amasezerano muri Rayon Sports. Byageze aho iyi kipe ibona gusinya bitagikunze ishaka kumusubiza itike y’indege ngo asubire iwabo muri Senegal.
Bitewe n’ikibazo cy’amikoro kiri muri iyi kipe, yakomeje kumvikana n’uyu mukinnyi ariko ibyo kumusinyisha igihe kirekire byari bitagishobotse. Mu masaha y’igitondo cyo kuri uyu wa Gatatu tariki 3 Mutarama 2024, ni bwo yamutangaje nk’umukinnyi wayo mushya.
Alon Paul Gomis akaba yasinyiye Rayon Sports amasezerano y’amezi 6 azarangirana n’umwaka w’imikino wa 2023-24, ndetse n’Igikombe cy’Amahoro, nyuma bakaba ari bwo baganira ku kongera andi masezerano.
Uyu rutahizamu w’imyaka 29, yakiniye amakipe nka; ASC Kedia yo muri Mauritania, aje yaje ahasanga Umunya-Guinea, Alseny Camara uheruka gusinyira iyi kipe, ariko akaba yaragize ikibazo cy’imvune ndetse binavugwa ko ashobora kutazakina imikino yo kwishyura ya shampiyona y’ikiciro cya mbere mu Rwanda.
Kuri ubu rero Rayon Sports ikaba yamaze gusinyisha rutahizamu Alon Paul Gomis amasezerano y’amezi atandatu.
