Ikipe y’ingabo z’igihugu APR FC, nyuma yo gutsinda Entincelles FC igitego 1-0, byatumye iguma ku mwanya wa mbere wa shampiyona.
Hari ku mukino waraye ubaye mwijoro ryakeye tariki 02 werurwe 2024, APR FC yari isanzwe iyoboye urutonde rwa Shampiyona irusha Rayon Sports ya kabiri amanota 7, ndetse inafite umukino w’ikirarane, yari yakiriye Etincelles FC kuri Kigali Pele Stadium saa 18h30’.
Mu minota ya mbere y’umukino, APR FC yarimo isatira ishaka igitego hakiri kare, ni nako Etincelles nayo yanyuzagamo igasatira, ariko amakipe yombi amahirwe babonye ntibabasha kuyabyaza umusaruro.
Mu minota 15 ya nyuma y’igice cya mbere, Etincelles FC yari yashyize igitutu kuri APR FC ndetse igenda ibona amahirwe ariko kwinjiza igitego biranga nuko bajya kuruhuka ari ubusa ku busa.
Ikipe ya APR FC yinjiye mu gice cya kabiri ishaka igitego ndetse iza kukibona ku munota 55, gitsinzwe na Shiboub ku mupira yari ahawe na Fitina.
Ku munota wa 60 Kwitonda Alain Bacca, yagerageje ishoti rikomeye yatereye inyuma y’urubuga rw’amahina ariko umunyezamu awushyira muri koruneri itagize icyo itanga.
APR FC yakomeje gushaka igitego cya kabiri ariko biranga umukino urangira ari igitego 1 cya APR FC kubusa bwa Entincelles FC.
Indi mikino iba uyu munsi ku Cyumweru tariki ya 3 Werurwe 2024.
Gasogi United irakina na Marines FC.
Sunrise FC ikine na Rayon Sports.
